దిల్ రాజు షాకింగ్ కామెంట్స్: “ఇప్పుడు నిర్మాతకు విలువ లేదు”

అలనాటి ప్రముఖ నిర్మాత అట్లూరి పూర్ణచంద్రరావు 90వ పుట్టినరోజు వేడుకలు ఈరోజు (ఫిబ్రవరి 18న) హైదరాబాద్‌లో ఘనంగా జరిగాయి. ఈ కార్యక్రమానికి మాజీ ఉప రాష్ట్రపతి వెంకయ్య నాయుడు, తమిళ సూపర్‌స్టార్ రజనీకాంత్, చిన్నజీయర్ స్వామితో పాటు సినీ, రాజకీయ రంగాలకు చెందిన పలువురు ప్రముఖులు హాజరయ్యారు. ఈ వేడుకలో నిర్మాత దిల్ రాజు చేసిన వ్యాఖ్యలు ఇప్పుడు పెద్ద చర్చగా మారాయి.

దిల్ రాజు మాట్లాడుతూ.. పూర్ణచంద్రరావు గారి కోసం అమెరికా నుంచి కూడా కొందరు వచ్చారని చెప్పారు. అలాగే తనకు పూర్ణచంద్రరావు గారితో మొదట పెద్దగా పరిచయం లేదని తెలిపారు. తాను చిత్ర పరిశ్రమలోకి వచ్చే సమయానికి పూర్ణచంద్రరావు గారు దాదాపు సినిమాలకు దూరంగా ఉన్నారని, తాను వచ్చిన తర్వాత కొన్ని సినిమాలు మాత్రమే నిర్మించారని గుర్తుచేశారు.

తన నిర్మాణంలో వచ్చిన తొలి సినిమా ‘దిల్’ ను హిందీలో రీమేక్ చేయడానికి రైట్స్ కావాలని పూర్ణచంద్రరావు గారు అడిగితే.. “మీరు చేస్తానంటే ఉచితంగా ఇస్తాను” అని తాను చెప్పినట్లు తెలిపారు.

అయితే ఈ వేడుకలో దిల్ రాజు చేసిన ప్రధాన వ్యాఖ్యలు ఇప్పుడు వైరల్ అవుతున్నాయి. “ఈ రోజుల్లో నిర్మాతకు విలువ తగ్గిపోయింది” అంటూ ఆయన షాకింగ్ కామెంట్ చేశారు. అప్పట్లో నిర్మాత అంటే ఇచ్చేవాడని, అందరూ తీసుకునేవాళ్లని అన్నారు. కానీ ఈ రోజుల్లో తీసుకునేవాళ్లే ఇచ్చేవాడిని శాసించే స్థాయికి సినిమా పరిశ్రమ వచ్చిందని దిల్ రాజు వ్యాఖ్యానించారు.

అట్లూరి పూర్ణచంద్రరావు గారిలో ఒక నిర్మాతకు ఉండాల్సిన మంచి లక్షణాలు అన్నీ ఉన్నాయని దిల్ రాజు ప్రశంసించారు. అలాగే రామానాయుడు గారు, పూర్ణచంద్రరావు గారు, కేఎస్ రామారావు గారు వంటి నిర్మాతలు వేసిన మార్గంలోనే తామంతా నడుస్తున్నామని చెప్పారు. పూర్ణచంద్రరావు గారు 87 సినిమాలు ఎలా నిర్మించారో తనతో పంచుకున్నారని తెలిపారు.

ఇలాంటి వేడుకకు తమందరినీ పిలిచి, అందరినీ ఒకచోట కలిపారని దిల్ రాజు అన్నారు. “ఇక్కడ ఉన్నవారిలో ఎవరికైనా 90వ పుట్టినరోజు వేడుక జరుపుకోవడం సాధ్యమవుతుందో లేదో తెలియదు.. అది పూర్ణచంద్రరావు గారికే సాధ్యమైంది” అంటూ ఆయనను ప్రత్యేకంగా కొనియాడారు. అలాగే శతజయంతి వేడుకల్లోనూ మనందరం ఇలాగే కలుసుకోవాలని ఆకాంక్షించారు. ప్రస్తుతం దిల్ రాజు చేసిన వ్యాఖ్యలు నిర్మాతల పరిస్థితిని స్పష్టంగా చూపిస్తున్నాయని పలువురు చెబుతున్నారు.